上兩篇文章同大家分享過關於市集既事情，其實做Popup短期實體銷售渠道又點知得市集一種呢，只係呢2年市集呢個Term實在太Hit，搞到大家一講起短租個場賣野就會歸納為「市集」，就連好多Online Store都改個名叫自己做「網上市集」，其實咪又係網店。咁究竟有幾多類Popup形式，而邊一種形式又適合自己呢？今次呢篇文章會同大家詳細探討。
基本上，大路既Popup場地有五類：市集、商場展銷、車仔檔、散租鋪以及會所攤位五大類。下面將會分析每個類型的特性、適合什麼行業以及相應的銷售策略。
《市集》
市集係近呢2年比較熱門的Pop-up選擇，原因有好幾個：第一，因為租金相對其他選項低 (市價大約400-600/日不等)；第二，因為呢2年大家都出唔到國，變相屈係香港要搵娛樂，市集就順勢而上 (其實疫情前都有市集，不過普及程度無今時今日咁厲害，呢家好似7仔咁幾乎每區總有1個市集。
市集的賣點係氣氛，一個市集最基本都有20檔以上。有些大場例如D2 Place 1期可以去到100檔以上。有氣氛自然帶動到人流，所以市集係5類Pop-up當中算係人流最多的一種。通常市集會提供1枱2椅比檔主，普遍市集都會用1.2 X 0.6米標準枱 (有時會有1.5米 / 1.8米枱)。
行市集既客戶群一般都係抱住湊熱鬧心態，好多都未必係Ready Buyer，而且客群普遍以年青人為主。所以一般佢地係市集會使既錢都唔會太多，好多時候都係行過岩Mood同埋價錢無傷大雅先會買。所以價位最好在$200內，如果可以1張$100紙解決到的會更好 (當然如果你產品富有特色，針對特定客戶群，咁就可以收貴點)。
做市集張枱擺盤好緊要，最基本要夠立體，最好用層架將產品有層次咁疊高。另外，放一些小擺設點綴一下，增加美感吸引客戶眼球。事前宣傳方面，檔主要善用IG作為宣傳平台，用限定優惠或者小禮物吸引粉絲到市集，俗語有云: 做生不如做熟，將粉絲由線上引落線下，就算當場無消費，其實都會增進客戶對你的忠誠度。
《商場展銷》
商場展銷係一個歷久不衰的形式，基本上由我出世都呢家都有。商場展銷通常會以幾多粒「骰仔」做單位。一般而言，1粒骰＝0.8米 * 0.8米。通常一個展銷位會以2粒骰起跳，常見會租2.5粒-4粒骰，視乎貨品數量同大小。商場展銷成本算是5類之中最高。首先，每日租金大約1500-2500不等，同埋一般做商場展銷最少都要1個星期 (因為商場會要求搞手搭建攤位，所以搞手通常會拉長展銷期以攤分撘建成本)，所以做一場租金差唔多要過萬。不過商場展銷一般成效都不錯，大多在商場中庭，人流有一定保證。一般以家庭客為主，通常賣食品、健康產品、家庭用品成效都不錯。貨品唔需要標榜好平，最重要係性價比高。
《車仔檔》
有時間你經過商場街市門口或者電梯口會見到一架展銷車仔，呢一類我地俗稱叫車仔檔。呢類車仔檔租金其實同你租展銷差唔多，不過時間會比較彈性，好少會迫你租晒成個星期 (因為免卻搭建成本)。呢類車仔人流都算多，因為通常係商場內人流轉角位。通常會比較適合做服務類推廣，例如保險、電訊、信用卡等。不過都會有做零售的車仔檔，呢類車仔檔相比展銷好處，除了時間彈性高之外，可以避免同類產品競爭，因為通常檔位會獨立一檔。
《散租鋪》
如果唔鍾意係商場擺，另一種選擇就係散租鋪。呢類鋪位通常係場主短租幾個月，然後拆租比商戶。商戶可以輕裝上陣，唔需要咁大投資去長租一個鋪，可以日計去擺檔。呢類散租鋪如果位置比較靚平均都要$1500/日以上了。做呢類散租場通常以散貨為主要目的 (亦有服務類會用作推廣)。目標客戶係街坊、師奶婆仔，所以賣既野主要係生活用品而且要標榜夠平，薄利多銷為主。第五波疫情期間，最多人租呢類散租場賣檢測劑，為求盡快散貨。
《會所攤位》
呢家好多私人屋苑樓下都會有會所，有時間周末你都會見到有幾個攤位係會所推廣產品/服務。會所展銷主要針對中產客戶群，消費力都不錯，最好揀一些有20年樓齡以上，因為佢地會較少供數負擔。呢類場地成本都唔少，平均都要$1000/日以上，而且人流係5類之中算少。所以做會所場要針對好特定客群，例如鋁窗工程、冷氣工種呢類成效會幾好。第一，佢地服務係入屋。第二，佢地單價較高，基本上做到1-2單都Cover晒租金有突。如果係零售類，一些中高端食品會較適合，例如凍肉、紅酒等。會所雖然人唔多，但如果識得打好關係，可能會有意想不到效果。例如，提供職員優惠。你要知道會所職員保安基本上係屋苑KOL，好多時住戶都係透過保安講先知屋苑有咩活動。另外，其實職員有佢地Whatsapp群，如果你產品平靚正既話，其實係會傳開去。
不過呢段時間，我個人就唔太建議做會所場。因為疫情關係其實全部會所都封晒。就算之後開返，經過呢2年疫情其實會所好多時都杯弓蛇影，有少少事就會臨時封場，好多時都會令商戶失預算。
我都知上面一大段字大家會睇得好辛苦。所以下面我整理了一個列表方便大家細閱同分析。如果覺得我寫得還可以既，賞個面分享出去。你地既分享同讚好係我繼續分享的原動力。
| 市集 | 商場展銷 | 車仔檔 | 散租鋪 | 會所 | |
| 租金成本 | 低 | 中-高 | 中-高 | 中-高 | 中-高 |
| 人流 | 中-多 | 中-多 | 中-多 | 多 | 少 |
| 適合貨品價位 | <200 | <500 | <100 | <100 | <500 |
| 客路 | 年青人 | 家庭客 | 街坊 | 街坊 & 師奶婆仔 | 家庭客 |
| 銷售策略 | 擺盤立體 注重美感 IG引流 小禮物 | 限定折扣 強調質素 (性價比) | 擺盤立體 擺盤豐富 善用Visual 適合服務類 | 以量取勝 薄利多銷 綑綁銷售 | 住客優惠 員工優惠 |