首先一講新屋苑搞展銷，第一時間就會唸：「入晒伙未架？」。呢個問題係令到好多商戶唔敢做新屋苑嘅原因。首先定義嘅新屋苑係落成3年內的屋苑啦，當然剛剛入伙你想做都無得做，管理處仲忙過你，邊有時間同你安排展銷呀。所以通常正式有展銷大約係入伙半年左右啦。正常嘅，新落成屋苑，淨係等人入伙都起碼要3個月。之前入伙話就話9月尾入得，最後要11月先正式收樓，仲要汁修，到聖誕節先正式入伙。同預定時間足足遲咗3個月。仲要我地係算早個批入，所以個屋苑真係有7-8成人都差唔多要半年左右。同埋新屋苑又真係未必賣得晒貨尾，所以好多商戶一聽到係新屋苑都會擔心唔夠人流。
不過又唔係咁睇，其實真係有人就有機。新屋苑係有新屋苑的玩法：首先時間係好重要，剛剛講過其實半年左右都開始入咗7成人，呢個時候就可以開始玩啦。
第二，針對新入伙住客需要。剛剛入伙其實真係好多野要買同做。我簡單舉個例，除甲醛，寬頻，驗樓（呢個就未必比擺，因為有搬石頭揼自己腳的味道，哈哈）等。同埋剛入伙個幾個月都會搞House Warming，所以紅酒又係一定需求。
第三，係非常好用的工具，就係《業主群》。呢個工具，係新屋苑同舊屋苑用係有天淵之別。點解呢？原因好簡單，大家同一時間入伙，好多業主都同一時間遇到好多相同問題，所以佢地都會圍爐取暖。淨講我地屋苑個群幾乎每日過千個msg。所以呢段時間成班住戶都好有火架，睇業主group分分鐘多過睇公司group，所以呢段善用呢啲群組會有大幫助。
我分享一次經驗，我自己屋苑有一日係會所搞咗個酒展，我中午入去睇完全無人，個sales姐姐都好無奈。我見佢請我飲幾杯，我即刻係業主群吹雞，2個鐘後我再返去已經入唔到去啦，成個場full晒。呢個就係新屋苑業主群嘅威力。所以新屋苑係咪唔值得去做？視乎時間，產品同方法。用得好，真係賺到笑的。