自從上年年底開始，多了好多市集搞手出現，同一時間市場對市集需求都增加了不少。其實市集係咪真係咁好做呢？穩陣不賠？有時候我都覺得幾好笑，如果比幾百蚊就一定包賺的話，我諗唔到呢個世界上點解會有窮人。
係我角度，選擇做市集第一個原因係小本。用幾百蚊已經可以擺檔搏個機會，無傷大雅。同埋市集的協同效應會帶動相類似的人流消費。不過有時都預左市集行既人會多過買野既人。其實有時都好睇搞手定咩主題吸引個班客群精唔精準，如果個主題過癮又切合返檔主產品，其實效果都幾唔錯。
你問我咁如果蝕錢做唔做？當然明知蝕就緊係唔做啦。但換個角度，做市集其實係一個比我地同客戶深入溝通交流的平台。平時都係IG, Facebook吸客，好傾既就Whatsapp傾多兩句，其實同客人都無咩交流。所以市集可以話係一個平台比我地建立更Loyal的關係。
再講，呢家Facebook, IG自然流量低到極點，除非賣廣告啦，如果唔係基本上都無咩人睇到D Post，就算睇到都未必係受眾。所以定期擺市集會有一定程度的品牌曝光，等多D相應人群認識我地。